Theatre Gu Leòr

Author: rhona

  • An t-Ùrlar as Àirde

    An t-Ùrlar as Àirde

    An t-Ùrlar as Àirde

    Tha Theatre Gu Leòr, prìomh chompanaidh tèatar na Gàidhlig, a’ toirt cuireadh dhuibh gu oidhche shònraichte a’ comharrachadh 10 bliadhna den obair àraid is àrd-amasach aca.

    Le measgachadh de pìosan tèatair ùr is sean, tha An t-Ùrlar as Àirde a’ sealltainn cho cruthachail is cumhachdach ’s a tha tèatar na Gàidhlig san latha an-diugh.

    Ann an Gàidhlig, le geàrr-chunntas sgrìobhte sa Bheurla.

    Ceannaich tiogaidean gu h-ìosal.

    Tiogaidean & Cinn-latha Cuairte

    30/09/26 Cnoc Soilleir, Uibhist a Deas TIOGAIDEAN AN SEO
    02/10/26     Las Port Rìgh, An t-Eilean Sgitheanach TIOGAIDEAN AN SEO
    07/10/26     Eden Court, Inbhir Nis TIOGAIDEAN AN SEO

    09/10/26 An Lanntair, Steòrnabhagh TIOGAIDEAN AN SEO

    13/11/26 Citizens Theatre, Glaschu Tiogaidean ri thighinn

    Cleasaichean & Sgioba Cruthachail

    Daibhidh Walker

    Elspeth Turner

    Dòl Eoin MacKinnon

    Lana Pheutan

    Ava MacKinnon

    Stiùiriche: Màiri Morrison

    Dealbhadh Seata is Aodaich: Frances Collier

    Dealbhadh Solais: Benny Goodman

    Dealbhadh Postair: Gallusness

    Dealbhan: Mihaela Bodlovic

    Manaidsear Riochdachaidh: Robbie Fraser

    Manaidsear Stèidse: Kat Siebert

    Riochdairean: Rhona NicDhùghaill & Deborah Claire Procter

    Ciad stiùiriche nan riochdachaidhean: Muireann Kelly

    Tha an dealbhadh seata stèidhichte air ealamaidean bho riochdachaidhean eile le Jen McGinley (ciad dealbhadair, Maim) agus Becky Minto (ciad dealbhadan, Stornoway, Quebec).

    Le taic bho

    Creative Scotland & Bòrd na Gàidhlig

  • Board Induction Info

    Fios Inntrigeadh a' Bhùird

    Air an duilleig seo gheibhear fiosrachadh a chumas taic riut nad dhreuchd mar bhall bhòrd Theatre Gu Leòr.

    Leugh na tha gu h-ìosal airson fiosrachaidh chuideachail fo na tiotalan a leanas:

    • Amasan Theatre Gu Leòr
    • Mun chompanaidh
    • Mun bhòrd & luchd-obrach
    • Geàrr-chunntasan coinneamhan a' bhùird
    • Ionmhas & buidhnean maoineachaidh
    • Dleastanasan buill a' bhùird

    Amasan Theatre Gu Leòr

    1. A' cur air adhart nan ealan, tro bhith a' cruthachadh agus a' lìbhrigeadh pròiseactan thèatair air leth, agus a' togail roinn tèatar Gàidhlig a tha làidir is àrd-amasach;
    2. A' cur air adhart foghlam, tro cothroman ionnsachaidh agus leasachaidh neo-fhoirmeil, do luchd-tèatair, luchd-tèatair òigridh agus luchd-èisteachd;
    3. A' cur air adhart na Gàidhlig, agus in-ghabhaltas is iomadachd cànanan ann an Alba.

    Chaidh iad sin a thoirt bhon Articles of Association againn, am bun-stèidh oifigeil againn. Faodar an rud air fad a leughadh an seo.

    Nach leugh sibh cuideachd mun còig sreathan obrach againn agus luachan na companaidh an seo.

    Mun Chompanaidh

    Tha Theatre Gu Leòr na prìomh chompanaidh tèatar na Gàidhlig. Bidh sinn a’ cumail taic ris, a’ leasachadh agus a’ cruthachadh tèatar ùr ann an Gàihdlig, ag obair còmhla ri luchd-ealain agus coimhearsnachdan air feadh na h-Alba. 

    Bhon a chaidh a thòiseachadh le Muireann Kelly ann an 2014, ga stèidheachadh gu h-oifigeil mar chompanaidh ann an 2016, tha Theatre Gu Leòr air a bhith a’ toirt iomadh riochdachadh àrd-amasach de dhiofar gnèithichean gu luchd-èisteachd timcheall na h-Alba agus thall thairis, ’s iad a’ toirt a-steach sreathan dràma rèidio, pròiseactan tèatar cloinne, agus dealbhan-cluiche mòra air cuid de na h-àrd-ùrlaran as ainmeile san dùthaich. Tha an obair againn adhartach agus làn mhic-mheanmna, air a brosnachadh le sgeulachdan a tha cho ioma-nàdarrach ri coimhearsnachd na Gàidhlig fhèin.

    Faodar leughadh mu na riochdachaidhean againn an seo.

    Mun bhòrd agus luchd-obrach

    ‘S e sgioba beag de luchd-obrach agus bòrd saor thoileach a tha os cionn Theatre Gu Leòr.

    Tha an Stiùiriche Cruthachail làn-ùine againn, Seona McClintock, a' stiùireadh a' phrògraim chruthachail, agus Manaidsear na Companaidh pàirt-ùine, Rhona NicDhùghaill, a' cumail sùil air gnothachail làitheil aig a' chompanaidh. 'S i Tanya NicDhòmhnaill an Stiùiriche Strabang! pàirt-ùine againn, ag obair bho Phort Rìgh, agus tha Màiri Nic'illeMhoire na Artistic Associate pàirt-ùine.

    Faodar leughadh mu bhuill a' bhùirt agus an luchd-obrach an seo.


    Geàrr-chunntasan coinneamhan a' bhùird

    Faodar geàrr-chunntasan nan coinneamhan a leughadh an seo, agus a' dol air ais thuca àm sam bith.

    Thèid an geàrr-chunntas bhon choinneimh mu dheireadh aontachadh aig an ath choinneimh, agus thèid bruidhinn air rud sam bith a nochdas bhuaithe.

    Ionmhas & Maoineachadh

    Tha Theatre Gu Leòr a' faighinn taic chunbhalach bho Alba Chruthachail (2025/26 - 2027/28) agus bho Bhòrd na Gàidhlig (2024/25 - 2028/29).

    Tha Alba Chruthachail a' cumail taic ris an obair chruthachail againn, agus Bòrd na Gàidhlig a' cumail taic ri amasan a thaobh leasachadh agus cleachdadh na Gàidhlig, Strabang gu sònraichte.

    Bidh Manaidsear na Companaidh a’ cumail rian air ionmhas na buidhne bho latha gu latha, le taic latha gach mìos bho neach-cunntais. Aig deireadh na bliadhna ionmhais, thèid na cunntasan a thoirt do cunntasair agus ise a’ cruthachadh Cunntas Urrasachd agus Aithisg Ionmhais, a thèid a chur air aghaidh an uairsin gu OSCR agus Companies House.

    Faodar na cunntasan bliadhnail againn a leughadh an seo.

    Uaireanan, cha bhi na cunntasan buileach a’ dèanamh ciall leotha fhèin, agus mar sin thèid fiosrachadh agus mìneachadh a bharrachd a thoirt seachad aig coinneamhan a’ bhòrd le Manaidsear na Companaidh.

    Dleastanasan Buill a' Bhùird

    ‘S e cùis chudromach a th’ ann a bhith air bòrd stiùiridh ach bu chòir dha bhith tlachdmhor gu ìre cuideachd (tha sinn ‘n dòchas, co-dhiù!).

    Tha sinn air a' phàipear ghoirid seo a chur ri chèile leis na prìomh dleastanasan a bhios aig buill a' bhùird. Nach toir sibh sùil gheur air seo. Bidh Manaidsear na Companaidh toilichte bruidhinn ribh air rud sam bith no ceist sam bith a fheagairt.

    Faodar a leughadh an seo.

    Trèanadh a' Bharrachd

    A bharrachd air an fhiosrachadh gu h-àrd, thèid cothrom trèanaidh eile a thabhainn do bhuill a’ bhòrd ùra aig Theatre Gu Leòr. ‘S e seo seisean 1-ri-1 còmhla ri Manaidsear na Companaidh, Rhona, aig a bheil eòlas air a’ chùis seo, agus, ma bhios sin a dhìth, latha trèanaidh air cùrsa Arts & Business Scotland, Introduction to Being a Board Member. Nach leig thu fios gu rhona@theatreguleor.com ma tha ceistean sam bith agad, no ma tha thu airson trèanadh a chur air dòigh. Introduction to Being a Board Member. Please contact rhona@theatreguleor.com if you have any question or to arrange further training.

    Mòran taing!

  • JOIN OUR BOARD

    THIG AN SÀS AIR AR BÒRD

    A bheil ùidh agad ann an tèatar na Gàidhlig? Am bu mhath leat taic a chumail ri companaidh proifeiseanta a tha ag obair air feadh na h-Alba?

    Tha Theatre Gu Leòr a’ sireadh triùir ùra don bhòrd againn agus tha sinn gu mòr airson cluinntinn bho dhaoine a tha airson tighinn an sàs don sgioba againn.

    A bharrachd air buill oifigeil, tha sinn airson luchd-amhairc a’ bhòrd no board observers fhastadh. Ma tha ùidh agad a bhith air a’ bhòrd, ach chan eil thu buileach deiseil gabhail ri ballrachd oifgeil, gheibh luchd-amhairc a’ bhòrd meantarachd a thaobh sgilean bhòrd agus aig na bidh dleastanasan laghail a thaobh obair a’ bhòrd thar bliadhna, le cothrom an uairsin tagradh a chur a-steach airson ball a’ bhòrd oifigeil ma thogras iad.

    Tha sinn fosgailte do thagraidhean bho dhuine sam bith aig a bheil ùidh làidir sa chompanaidh, ach tha sinn gu sònraichte airson cluinntinn bho:

    –       artists with links to or interest in Gaelic (not necessarily theatre artists)

    - Daoine a' fuireach anns na h-Eileanan

    - Daoine eadar 16* is 30 bliadhna a dh'aois

    - Daoine le sgilean ann an ionmhas, togail airgead, HR no lagh

    Coinnichidh am bòrd againn ceithir tursan sa bhliadhna, mar as trice air loidhne. Faodar leughadh mu na buill a th’ againn an-dràsta an seo. an seo.

    Thèid pasgan inntrigidh a thoirt do bhuill ùra, agus cùrsa trèanaidh air sgilean bhòrd a thabhainn cuideachd. Gheibh luchd-amhairc a’ bhòrd meantarachd is taic sònraichte, a bharrachd air sin.

    Ma tha ùidh agad ann, air no ma tha thu airson bruidhinn rinn mun chothrom seo, nach cuir thu fios thugainn. Bhiomaid gu math toilichte còmhradh neo-fhoirmeil a chumail is ceistean sam bith a fhreagairt, air no do chur ann an conaltradh ri daoine a a tha air a’ bhòrd an-dràsta.

    Gus cur a-steach, innse dhuinn mu na sgilean agus an eòlas a th’ agad, agus carson a tha thu airson a bhith air a’ bhòrd - faodaidh seo a bhith sgrìobhte, no air bhideo. Cuir sin ann am post-d gu:

    Seona NicGillFhionndaig, Stiùiriche Cruthachail: seona@theatreguleor.com & Rhona NicDhùghaill, Manaidsear na Companaidh: rhona@theatreguleor.com. seona@theatreguleor.com & Rhona Dougall, General Manager: rhona@theatreguleor.com.

    Ceann-latha airson tagraidhean: Diluain 23mh den Mhàrt 2026.

    *Tha fàilte ro daoine òga aois 16/17 a bhith nam pàirt den bhòrd againn, ged nach bi na h-aon dleastanasan orra buileach ’s a bhios air buill aois 18+. Thèid bruidhinn air seo tron phròiseas trusaidh.

  • Open Door

    Doras Fosgailte

    Tha sinn a' tabhainn seiseanan 1:1 do luchd-ealain is luchd-thèatar, an dà chuid daoine ùr don roinn agus feadhainn nas stèidhichte. B' urrainn dhuinn bruidhinn air cothroman obrach, meantoradh, leasachadh proifeiseanta, leasachadh sgriobtaichean, no rud sam bith a bhiodh feumail dhut fhèin.

    Thèid seiseanan a chumail air loidhne, ann an Glaschu, no aig fear de na seiseanan Doras Fosgailte timcheall na dùthcha. Cùm sùil air an làrach-lìn agus air na meadhanan sòisealta airson naidheachdan ùra mu sheiseanan Doras Fosgailte faisg ort fhèin.

    Gus coinneamh iarraidh, lìon am foirm gu h-ìosal.

    Foirm Choinneimh

    Image credit: Mihaela Bodlovic

  • Send Us A Script

    Cuir Thugainn Sgriobt

    Tha sinn an-còmhnaidh toilichte a chluinntinn bho sgrìobhadairean le dreachd shlàn de sgriobt no pàirt de sgriobt a tha iad airson cur thugainn.

    Thèid na sgriobtaichean chun an Stiùiriche Chruthachail againn, a nì Foirm Lèirmheas Sgriobt a' toirt a-steach na leanas:

    • Sealladh farsainn air an sgriobt
    • Beachdan breitheach taiceil
    • Iomchaidheachd do Theatre Gu Leòr
    • Molaidhean airson nan ath cheumanan

    Thèid seo a chur air ais don sgrìobhadair taobh a-staigh 8 seachdainean. Faodaidh a' chompanaidh no an sgrìobhadair an uairsin faighneachd airson coinneimh gus bruidhinn barrachd air an sgriobt.

    'S e companaidh bheag a th' ann an Theatre Gu Leòr, le buidseat cuingichte, mar sin ged a tha sinn an-còmhnaidh toilichte sgriobtaichean ùra fhaighinn, tha crìochan air nas urrainn dhuinn toirt air adhart gu ìre leasachaidh no thaisbeanaidh.

    Gus an sgriobt agad a chur thugainn, nach lìon thu am foirm gu h-ìosal agus luchdaich suas e mar faidhle Word nuair a thèid iarraidh ort.

    Submission Form

  • Ticket Support

    Taic Thiogaidean

    Mu dhèidhinn a’ phrògraim

    Tha e cudromach do neach-ealain sam bith a bhith a’ faicinn fairsaingeachd de dh’obair eile a bheir dhaibh seallaidhean ùra mun obair aca fhèin, neo a dh’fhosglas dòigh smaoineachaidh ùr dhaibh. Tha maoin a-nis againn airson luchd-ealain tèatair le Gàidhlig a’ dol a dh’fhaicinn diofar thaisbeanaidhean neo tachartasan a chuideachas iad an cuid eòlais a leasachadh.

    Dè an taic a tha ri fhaighinn?

    ’S urrainn dhuinn pàigheadh airson na cosgaisean a leanas:

    • Tiogaidean
    • Siubhal (thairis air £5.00)*, a gabhail a-staigh na cosgaisean a bharrachd airson siubhal agus àite-fuirich a dh’fhaodadh a bhith aig luchd-ealain stèidhichte air a’ Ghaidhealtachd agus sna h-eileanan
    • Cosgaiseanso-ruigsinneachd, a’ gabhail a-staigh dleastanasan cùraim

    Faodar taic iarraidh airson taisbeanaidhean neo tachartasan co-cheangailte ri tèatar, a tha a’tachairt ann an Alba, agus faodar taic iarraidh aig an aon àm airson suas gu trì thachartasan.

    *Ri linn Poileasaidh an t-Siubhail Sheasmhaich againn, tha sinn a’ cur prìomhachas air còmhdhail phoblach agus cha phàigh sinn mileage airson càr a chleachdadh ach ann an suidheachaidhean far nach gabh còmhdhail phoblach a chleachdadh. Tha sinn a’ seachnadh siubhal itealach uile gu leìr.

    Thèid maoineachadh a thabhann fo ùghdarras Theatre Gu Leòr. Bidh crìoch air a’ bhuidseat seo gach bliadhna, agus dh’fhaodadh nach b’ urrainn dhuinn gabhail ris a h-uile tagradh.

    Cò gheibh an taic?

    Feumaidh iarrtasan tighinn bho luchd-ealain a tha:

    • Stèidhichte ann an Alba
    • A’ cleachdadh na Gàidhlig mar phàirt dhan obair aca
    • Ag obair, neo ag amas air obair, san roinn tèatair‘S urrainn dhuinn pàigheadh airson na cosgaisean a leanas:

    Ciamar a chuireas mi a-steach tagradh?

    Tha na cinn-latha againn airson 2025/26 air 15mh den Dùbhlachd 2025 agus 16mh den Mhàrt 2026.

    Lìon am foirm a tha seo airson innse dhuinn mun taisbeanadh neo tachartas a tha thu airson frithealadh agus dè an taic a tha a dhìth ort. Gheibh thu freagairt bhuainn taobh a-staigh dà sheachdain.

    Ma bhios an dealbh-chluich a' tachairt taobh a-steach dà sheachdain, lìon am foirm agus cuir post-d gu info@theatreguleor.com gus innse dhuinn, agus nì sinn ar dìcheall taic a chur thuga.

    Foirm Tagraidh

  • Gaelic Support

    Taic Sgilean Gàidhlig

    Mu dhèidhinn a’ phrògram

    Tha sinn airson taic a thoirt do dhaoine a tha ag obair san roinn tèatair le ùidh ann an obair Ghàidhlig a bhith a leasachadh an cuid sgilean cànain. Tha seo gu sònraichte freagarrach don fheadhainn a tha air Gàidhlig ionnsachadh gu ìre agus a tha a’ sireadh cothrom an ath cheum a ghabhail gus a bhith ag obair ann an àrainneachd Ghàidhlig.

    Dè an taic a tha ri fhaighinn?

    B’ urrainn dhuinn cosgaisean a phàigheadh co-cheangailte ri na sgilean Ghàidhlig agad a leasachadh, m.e. cùrsa goirid, oideachadh 1:1, streath leasanan, siubhal agus àite-fuirich co-cheangailte ris na cothroman ionnsachaidh seo.

    Bu chòir dhut obrachadh a-mach dè an dòigh-ionnsachaidh as freagarraiche dhut fhèin, agus na cosgaisean a bhiodh an lùib sin.

    Pàighidh sinn suas gu £750 aig an ìre as àirde, ach feumaidh tagraichean sealltainn gun dèan an taic sin diofar mòr dhaibh a thaobh an cuid Gàidhlig.

    Thèid maoineachadh a thabhann fo ùghdarras Theatre Gu Leòr. Bidh crìoch air a’ bhuidseat seo gach bliadhna, agus dh’fhaodadh nach b’ urrainn dhuinn gabhail ris a h-uile tagradh.

    B’ urrainn dhut cuir a-steach cuideachd airson cosgaisean so-ruigsinneach fa leth co-cheangailte ris a’ chothrom ionnsachaidh seo, a’ toirt a-steach cùram cloinne.

    Cò gheibh an taic?

    Feumaidh iarrtasan tighinn bho luchd-ealain neo luchd-obrach tèatar a tha:

    • Stèidhichte ann an Alba
    • Ag obair san roinn tèatar
    • Mar tha ag obair neo ag amas air obair tro mheadhan na Gàidhlig san àm ri teachd.

    Ged a tha fàilte air iarrtasan bho luchd-ionnsachaidh ùra, bidh prìomhachas air iarrtasan bho dhaoine a tha air ionnsachadh a dhèanamh roimhe agus a tha airson tuilleadh adhartas a dhèanamh.

    Ciamar a chuireas mi a-steach tagradh?

    Tha na cinn-latha airson 2025/26 air 15mh den Dùbhlachd 2025 agus 16mh den Mhàrt 2026.

    Nach lìon thu am foirm seo gus innse dhuinn mud dheidhinn fhèin, agus mun taic a tha thu a’ sireadh. Gheibh thu freagairt bhuainn taobh a-staigh dà sheachdain.

    Foirm Tagraidh

en_GBEnglish (UK)
en_GBEnglish (UK)